ألمانيا تقريبًا ليها أكتر من 20 تسمية مختلفة عند الدول المختلفة، على سبيل المثال Deutschland وTyskland وGermany وألمانيا وDoitsu و Tedesco وغيرهم كتير.
الموضوع سببه الأساسي هو إن الألمان أو الچرمانيين (إللي شعرهم أصفر وعيينهم زرقا أو الشكل التقليدي للألماني والإسكندنافي) وجودهم سابق على ألمانيا وكانوا مجموعة قبائل عايشين في المنطقة المعروفة حاليًا بألمانيا وبعض المناطق المحيطة. أوروبا فيها نهر أسمها الراين، الحضارة الرومانية قدرت تسيطر على كل حاجة غرب النهر دا (لحد فرنسا) بس بعد كدا الألمان هزوموهم ووقفوا الزحف بتاعهم للأبد تحت إمرة Arminius ذو ال26 سنة ومعاه توقف الزحف الثقافي للرومان وبعد كدا الموضوع أتعكس وبقوا الجرمانيين هم إللي بيتجهوا غربًا للسيطرة على المناطق بتاعت الرومان، فيه قبيلة منهم أسمها الFranks هي إللي أحتلت المنطقة المجاورة لألمانيا إللي أسمها Gallia وبعد كدا المنطقة خدت أسمها Francia وبعد كدا بقت France في القرن الخامس ودي نفس القبيلة إللي ، القبيلة دي كان أكبر تنازعاتها مع قبيلة من أولاد عمهم الجرمانيين على شرقهم أسمها الِAllemani ومن هنا جاء أسم "ألمانيا" وفرنسا سمتها وإسبانيا والبرتغال والعرب وغيرهم سموها بنفس التسمية الفرنسية.
الألمان بقى نفسهم إللي عايشين في البلد سموا بلدهم Deutschland من كلمة theodisca ودي معناها "الشعبي" لأن في الوقت دا (القرن التامن) ألمانيا بسبب الحروب والإختلاطات الثقافية السابقة، الطبقة الحاكمة كانت بتتكلم اللغة اللاتينية بتاعت الرومان، ولكن الشعب كان بيتكلم لغة الtheodisca إللي هي معناها "الشعبي" عشان يعملوا تفرقة بينهم وبين الطبقة الحاكمة، وكلمة theodisca دي بقت Tysk في السويدي وTedesca في الإيطالي، وDutch في الإنجليزي، بس الإنجليزي أطلقوا الكلمة على أقرب ناس من أقارب الألمان ليهم وهم الهولنديين ولذلك الهولنديين أسمهم Dutch.
فنلندا وإستونيا والدول القريبة منهم كانوا بيتكلموا لغات تانية خالص وإحتكاك تاني خالص مع ألمانيا وبالتالي سموا البلد على أسم قبيلة جرمانية تانية غير دول أسمها "الساكسون" وبقت ألمانيا أسمها Saksa في الفنلندي وتحويرات من الكلمة دي في إستونيا والدول المجاورة.
السلافيين (الروس وأقاربهم بس في الحالة دي خاصة أقاربهم زي بولندا وأوكرانيا) جابوا كلمة مختلفة لألمانيا وهي مشتقة من كلمة "بيهرتل" أو "بيرطن" أو بيقول كلام مش مفهوم، من فكرة إن ألمانيا لغتها مختلفة عنهم، والكلمة دي بقت Niemcy وتحويرات منها. وتسمية الآخرين على أسم الهرتلة أو الكلام غير المفهوم كانت شائعة في الأوقات دي زي ما اليونانيين كانوا بيسموا أي حد مش بيتكلم لغتهم أو مش بيفهموه بكلمة barbaros أو إللي بيقولوا blah blah blah أو بيهذوا ومن هنا جاءت كلمة بربري.
الألمان كان عندهم كلمة خاصة بيهم للأجانب إللي مش بيتكلموا لغتهم وهي walhaz ومنها جاء أسم دولة Wales وغيرها عشان الإحتكاك إللي حصل بين الألمان والسلتيين (أجداد الويليزيين أو الBritons) في بريطانيا (الإنجليز الحاليين أصلهم أغلبه ألماني، كانوا ألمان وهولنديين وجرمانيين مسافرين للبحث عن معيشة أفضل في الشمال) وبالتالي الويلزيين، إللي كانوا موجودين هناك قبل الجرمانيين، كانوا متسميين بأسم الأجانب أو المنبوذين.
